قبل ما نخش في الموضوع علشان الناس ما تهربش من قراءة الدليل، حابب أوضح إن الدليل دا موجه فعلا "لأي" شخص من أي خلفية بيستخدم الإنترنت والتكنولوجيا، حتي لو كان إستخدامه مقتصر بس علي الدخول علي فيسبوك أو إستخدام برامج المحادثات مثلا في أطر ضيقة زي التواصل الإجتماعي. يعني مش لازم تكون ناشط سياسي مثلا أو مطلوب من السلطات علشان تهتم بأمانك الرقمي وخصوصيتك (هوضح ليه قدام). في نفس الوقت بردو الدليل مفيد للناس اللي فعلا مهتمة بأمانها الرقمي والحفاظ علي خصوصيتها بس معندهاش خلفية تكنولوجية كافية تخليها تعرف تأمن نفسها بنفسها أو معندهاش وقت كافي للبحث في الكلام دا وتطبيقه.

أنا مبرمج مهتم شوية بالتكنولوجيا والأمان الرقمي والخصوصية. غير خبير بالمرة بس أعرف شوية حاجات وحابب أنقلها للناس بطريقة سهلة ومبسطة وأهم حاجة بالمصري. التكتيكات والممارسات اللي هشرحها ممكن تكون صح الي حد ما وممكن الخبراء يغلطوني ويصححوا لي حاجات ويضيفوا حاجات(يا ريت) بس بردو في الأول وفي الأخر مفيش طريقة هتضمن لك الأمان مية في المية وأنا مش هدعي إنك لو مشيت علي الدليل دا هتبقي في أمان كامل. لكن علي الأقل هتقدر توصل لدرجة نسبية من الأمان والخصوصية وأنت بتستخدم الإنترنت.

وثائقي بيتكلم عن محاكمة مديري موقع thepiratebay https://www.youtube.com/watch?v=eTOKXCEwo_8

وثائقي بيحكي قصة إدوارد سنودن اللي كان شغال في وكالة الأمن القومي الأمريكي وفضح ممارستهم بعد هروبه من أمريكا https://www.youtube.com/watch?v=XiGwAvd5mvM

وثائقي بيتكلم عن محاكمة أحد مديري موقع silkroad علي الويب الخفي https://ar.wikipedia.org/wiki/%D9%88%D9%8A%D8%A8_%D8%AE%D9%81%D9%8A https://www.youtube.com/watch?v=BvC9oDlT8mM

وحاجات تانية كتير..

تخيل نفسك راكب في المترو وبتقرأ الجريدة اليومية أو بتتصفح موقع أخبار من علي موبايلك وللأسف الراجل المسالم جدا اللي قاعد جنبك كل 5 ثواي بيرمي عينه علي المقالة اللي أنت بتحاول تقرأها بغض النظر عن جدية المقالة أو تفاهتها، إحساسك هيكون عامل إزاي؟ أنا عن نفسي مش هكمل قراءة المقالة وهفتح صفحة أخبار النجوم أو الرياضة وأعمل أكني بقرأها وهستكمل قراءة المقالة الأولي في وقت تاني. حد تاني ممكن يقفل الجرنال أو الموبايل خالص ويستكمل اللي بيعمله في وقت تاني. ليه دا حصل؟ علشان أنا/أنت حسيت بإحساس غير مريح نتيجة ل "إنتهاك خصوصيتك". إحساس ناتج عن إقتحام مساحتك الشخصية من حد متطفل، بالرغم من أنت عارف ومتأكد مية في المية إن الشخص دا عمره ما هيضرك. مش لازم تكون ناشط سياسي واللي جنبك دا مخبر علشان تحس بإنتهاك لخصوصيتك خالص. مثال تاني، تخيل نفسك بتحاول تتواصل مع صديقة عالنت علشان ترتب حفلة مفاجئة لعيد ميلاد صديقكم التالت وهو قاعد جنبك كل شوية بيبص علي الموبايل؟ عمرك ما هتعرف تبدع في الترتيب للحفلة دي علشان مش عارف تعبر عن أفكارك وأرائك في الترتيب للحفلة بسبب إن صاحبكم التالت قاعد جنبك وممكن يعرف والمفاجئة تبوظ.

اللي بحاول أوصله بالأمثلة البسيطة جدا دي هو كذا حاجة:

1. حرية الإبداع مش مرتبطة بس بحرية التعبير. يعني مش علشان أنت عندك حرية التعبير عن أرائك زي ما أنت عايز سواء مثلا في جريدة أو علي الفيسبوك بس معندكش القدرة إنك تعمل محادثة خاصة يبقي أنت بتستخدم إبداعك الكامل.

2. الخصوصية حقك ولازم تهتم بيها وتدافع عنها وتنميها. بغض النظر عن تفاهة أو جدية المضمون الخصوصي، هتفضل بردو حق.

3. مش لازم تكون بتعمل حاجة غلط (مجرم مثلا) ومش عايز حد يشوفها علشان تهتم بخصوصيتك .. الخصوصية مش مرتبطة بمدي صحة أو خطأ السياق.

لو أنت لسا مش مقتنع إن الخصوية حاجة مهم فأنا بدعوك إنك تركب كاميرا مراقبة في بيتك وتبث منها 24 ساعة عالنت. أو تبعت لي كلمة السر لكل حاجة بتستخدمها عالنت. محدش هيعمل كدا طبعا!

أخيرا، بدعوك لمشاهدة المحاضرة دي (مترجة للعربية .. محتاج أحط صورة لكيفية تغيير الترجمة) https://www.ted.com/talks/glenn_greenwald_why_privacy_matters